Олий лиганинг 2-турида “Қизилқум” – “Навбаҳор” ўйини бўлиб ўтди.
Навоийда кечган учрашув мезбонларнинг ғалабаси билан якун топди. Биринчи бўлимда улар тезкор гол уришни уддасидан чиқишди. Жасур Ҳасанов ўнг қанотдан тўпни жарима майдончасига етказиб берганида, Азамат Алланиёзов “Навбаҳор” дарвозасини аниқ нишонга олди - 1:0.
“Навбаҳорчилар” вазиятни ўнглаш мақсадида ҳужум ташкил этишга интилишди. Бу уринишлар ўз самарасини келтирди. Қиличев тўпни Саидовга етказиб берди. Мансурнинг зарбасини Хонимқулов ушлаб қолишни уддасидан чиқа олмади ва тўп дарвоза чизиғини кесиб ўтди.
Танаффусга қадар ҳар икки жамоа вакилларида ҳисобни ўзгартириш учун қулай имкониятлар вужудга келганди. Аммо “Қизилқум” ва “Навбаҳор” ҳимоячилари бунга йўл қўйишмади.
Иккинчи бўлим наманганликларнинг фаоллиги билан бошланди. Навоийликлар эса асосан қанотлардан ҳужум ташкил қилишди. 77- дақиқада мезбонларнинг бу ҳаракати уларга фойда келтирди. Шерали Жўраевнинг чап қанотдан узатиб берган тўпини Илҳом Юнусов боши билан Аманов қўриқлаган дарвозага жойлаб қўйди - 2:1. Ўйин охиригача навбаҳорчилар ҳисобни тенглаштириш учун астойдил ҳаракат қилишди. Лекин, барча урунишлар самарасиз якунланди. Шу тариқа “Навбаҳор” Олий лиганинг жорий мавсумида дастлабки мағлубиятни тан олди.
Навбатдаги учрашувни «Навбаҳор» 18- март куни Фарғонанинг “Нефтчи” жамоасига қарши ўз майдонида ўтказади.
Олий лига, 2-тур.
10 март 2017 йил. Навоий. “Ёшлар” спорт мажмуаси. 7565 томошабин.
“Қизилқум” – “Навбаҳор” 2:1 (1:1)
Голлар: А. Алланиёзов (5), И. Юнусов (77) – М. Саидов (27)
Ҳакамлар: В. Серазетдинов, А. Сидоров, Д. Сайлавов, А. Рисқуллаев.
Назоратчи - Ғ. Каримов.
ПФЛ вакили - Б. Ҳайдаров.
“Қизилқум”: 16. Умид Хонимқулов, 3. Шукурали Пўлатов, 4. Эркин Бойдуллаев, 10. Воҳид Шодиев, 14. Файзулло Қамбаров, 15. Азамат Алланиёзов (77. Бегзод Ғанижонов, 89), 17. Артур Геворкян, 19. Жасур Ҳасанов (9. Отабек Зокиров, 90+2), 23. Шерали Жўраев, 25. Азизбек Усмонов, 27. Илҳом Юнусов.
“Навбаҳор”: 30. Асилбек Аманов, 2. Алишер Саматов (77. Азизбек Турғунбоев, 81), 5. Ғиёс Комилов, 7. Ойбек Қиличев (33. Тоҳир Шамшитдинов, 87), 9. Дилшод Жабборов, 10. Мансур Саидов (22. Рўзим Аҳмедов, 75), 19. Мирзоҳид Ғофуров, 21. Аъзам Алиев, 32. Жаҳонгир Меҳмонов, 44. Дарко Станоевич, 84. Неманья Йованович.
Огоҳлантиришлар: Ф. Қамбаров (20) – А. Алиев (31), Ж. Меҳмонов (43), А. Саматов (79), Р. Аҳмедов (89).
