Жорий йилнинг 26 июн кунидан бошлаб 3 июл кунигача Россиянинг Санкт-Петербург шаҳрида “Футбол дўстлик учун” лойиҳасининг финал босқичи бўлиб ўтади.
Эътиборли жиҳати болалар ўртасида фестивал кўринишида ўтадиган ушбу лойиҳада бу йил Ўзбекистон Футбол Федерацияси ҳам ўз вакиллари билан иштирок этади.
“Футбол дўстлик учун” халқаро лойиҳаси ФИФАнинг болалар футболига бағишланган энг катта лойиҳаларидан биридир. Бу йил лойиҳанинг финал босқичида 64 мамлакат вакиллари иштирок этишади. Аввалроқ хабар берганимиздек, лойиҳа доирасида ўтадиган футбол турнирида ҳар бир мамлакат бир нафар футболчи билан иштирок этади. Шу йилнинг 16 март куни Гамбург шаҳрида турнирга қуръа ташлаш маъросими бўлиб ўтди. Бу мавсумда “Футбол дўстлик учун” лойиҳасида ўз иштирокини бошлайдиган Ўзбекистон Футбол Федерацияси қуръага кўра “яшил дўстлик жамоаси”дан жой олди. Яна бир муҳим факт – қуръа Ўзбекистон номидан лойиҳада ёш дарвозабон иштирок этишини аниқлаб берди. Шундан сўнг, Ўзбекистон Футбол Федерацияси бутун
Республикамиз бўйлаб 12-14 ёшдаги иқтидорли дарвозабонларни саралаб олиш ишларини олиб борди. 19 апрел куни эса Тошкет шаҳрида худудий саралашлардан муваффақиятли ўтган 7 нафар ёш номзод иштирокида саралашнинг финал босқичи ўтказилди. Бунда номзодларнинг ҳаракатларни Ўзбекистоннинг энг номдор дарвозабонлар билан ишлаш мураббийлари кузатиб боришди.
Умуман олганда номзодлар икки босқичда синовдан ўтишди. Мутаҳассислар аввал бевосита майдондаги машғулот ва ўйин вақтидаги ҳаракатларни кузатиб, баҳолаб 7 нафар ёш дарвозабон ичидан 3 нафар энг яхшисини ажратиб олишди. Энг кучлилар орасида “Локомотив”, “Бунйодкор” ҳамда “Насаф” жамоалари тарбияланувчиларини кўриш мумкин эди.
Шундан сўнг, “Футбол дўстлик учун” лойиҳаси бу халқаро лойиҳа бўлганлиги ҳисобга олинган ҳолда номзодлар билан инглиз тилида кичик суҳбат бўлиб ўтди. Бунда номзодлар ўзлари ҳақида инглиз тилида маълумот бериб, Ўзбекистон Футбол Федерацияси мутаҳассислари ҳамда юртимизнинг таниқли спорт журналистлари томонидан берилган саволларга жавоб қайтаришди.
Ўзига хос суҳбат якунланлач, 3 нафар номзод орасидан тошкентнинг “Локомотив” жамоаси тарбияланувчиси Илёс Аҳмедов Ўзбекистон Футбол Федерацияси томонидан “Футбол дўстлик учун” халқаро лойиҳасида иштирок этиш учун танлаб олинди.
