28 май куни Италия А сериясинининг сўнгги, 38-тури доирасида «Рома»нинг афсонавий сардори, 40 ёшли «император» Франческо Тотти профессионал футболчилик фаолиятидаги сўнгги ўйинини ўтказади. Шу муносабат билан футбол оламидаги энг кўзга кўринган шахсларнинг италиялик ҳужумчи тўғрисидаги фикрларини тақдим этамиз.
Пеле, 2016 йил май: «Тотти италиялик Пелеми? Ҳа, шундай дейиш мумкин. Бу супер футболчи».
Диего Марадона, 2017 йил май: «Франческо Тотти – Рим императори! У мен ҳаётим давомида кўрган энг яхши футболчи бўлиб қолади».
Флорентино Перес, 2013 йил июн: «Мен Тоттини «Реал»га олиб келишга уринганим рост. Бу жуда буюк футболчи, бироқ бу ушалмаган орзулигича қолди».
Зинедин Зидан, 2016 йил феврал: «Бу Тотти бир ўзи ўйнайдиган спектаклдир, унинг олдида шляпамни ечаман. Футболни яхши кўрувчи инсонлар Тоттини майдонда кўришни истайди».
Мишел Платини, 2015 йил октябр: «Тотти футбол даҳосидир. У бутун фаолиятини бир жамоада ўтказган ягон буюк футболчи».
Франс Беккенбауэр, 2009 йил декабр: «Тоттининг ҳақиқатдан олтин оёқлари бор. У бутун дунёга машҳур Бандиера (байроқ)дир».
Лионел Месси, 2016 йил сентябр: «Мен сенга доим ҳавас қилиб келганман, сени учратган кунимдан буён бу ҳавас янада ошган. Умид қиламанки, сен ҳали яна узоқ вақт ўйнайсан».
Арсен Венгер, 2009 йил феврал: «Бу жаҳон даражасидаги футболчи. Тотти ҳамма ишни бир ўзи қилиши мумкин. Унинг ҳар бир тўп узатиши сизни «ўлдириши» мумкин. У бир ҳаракат билан ҳимояларни «очиб ташлай» олади».
Милош Земан, 2016 йил июн: «Тарихдаги беш нафар энг яхши италян футболчиси? Тотти, Тотти, Тоттти, Тотти ва Тотти».
Луис Энрике, 2014 йил май: «Мен Тоттига мафтун бўлган одамман. Ҳатто унинг рафиқаси уни мендан рашк қилади. Бу чемпион билан ишлаш мен учун шараф эди».
Роже Федерер (теннисчи), 2016 йил апрел: «Франческо ва мен ўз спорт турларимизда тимсоллармиз. Унинг футбол учун қилган ишларига тенг келадигани йўқ. Бу ҳақиқий намуна. Бу замонавий тимсол».
Пеп Гвардиола, 2014 йил октябр: «Бу ҳайратланарли футболчи. Унинг футболга бўлган муҳаббатини ҳис қилиш мумкин. Уни ҳозирги ёшида шундай қатъий ҳолда кўриш – ажойиб».
Раул, 2015 йил апрел: «Тотти ажойиб футболчи, ўз авлодининг энг яхшиларидан бири. Уни ўз жамоасида кўришни истамаган кимдир борми?».
Лука Модрич Тотти билан алмаштирган футболкаси ҳақида: «Бу футболка мен ўз фаолиятимда алмашган либослар орасида энг қадрлисидир. У менинг кумирим».
