«Севилья» яримҳимоячиси Витоло трансфер мавсумининг «қаҳрамони»га айланди.

27 ёшли футболчи дастлаб «Севилья» билан янги шартнома ҳақида келишиб олди. Клуб президенти Хосе Кастро бу ҳақда эълон қилишга ҳам улгурди. Бироқ, шу куни унга «Атлетико» вакиллари қўнғироқ қилиб, 5 млн евро маош таклиф қилди. Футболчи ўйлаб ўтирмасдан, зудлик билан Мадридга етиб борди ва «матрасчилар» билан шартнома имзолади.

Аммо «Атлетико» ФИФА тақиқи туфайли январь ойигача таркибига янги футболчиларни қўшиб ололмаслиги сабабли, Витоло «Лас-Пальмас»га ижарага бериб юборилди. Қизиғи шундаки, бу воқеаларнинг барчаси бир кун ичида амалга оширилди.

Энди футболчи ярим йил давомида «Лас-Пальмас»да ўйнаб, кейин Мадридга қайтади.

"Лас-Пальмас" унинг трансфери учун "Севилья"га 37,5 млн евро тўлайди. Январда эса бу пулларни "Атлетико"дан қайтариб олади.