"Вердер" ва "Аякс" жамоалари ўртасида ўтказилган учрашувнинг 72-дақиқасида, кутилмаганда ўзини нохуш ҳис қилиб майдонга йиқилган ва бироздан сўнг ҳушидан кетган Абдулҳақ Нурий аслида жиддий ва бедаво дардга чалингани маълум бўлди.
"Аякс" клубининг хабарига кўра, 20 ёшли футболчининг тикланиб олиш имконияти йўқ экан.
"Бу энг ёмон хабар. Нурийнинг яқинлари ва дўстларининг ҳозирги изтиробларини сўз билан ифодалаб бўлмайди. Бу воқеаларнинг исталган ривожига тайёр турадиган «Аякс» учун ҳам жиддий зарба" — деди клуб бош директори Эдвин ван дер Сар.
Дастлабки маълумотларга кўра, Нурий юрагидаги аритмия туфайли ҳушидан кетгани айтилганди.
Абдулҳақ Нурий "Аякс" тарбияланувчиси ҳисобланади. У 2015 йилда жамоа таркибида дебют қилган. Ўтган мавсумда Нурий клуби сафида барча турнирлар доирасида 41 учрашув ўтказган, 11 гол уриб, 14 голга узатма берганди.
