Шу йилнинг 9 сентябрь куни пойтахтнинг “Бунёдкор” стадионида ASIAN FIGHT халқаро спорт турнири бўлиб ўтди.
Мазкур турнирда Жан Клод Ван Дамм, Жеф Монсон ва Фёдор Емельянко каби жаҳон юлдузлари иштирок этиши кўпчиликда қизиқиш уйғотган эди.
Бироқ турнирга саноқли кунлар қолганида мазкур таниқли шахслар Ўзбекистонга кела олмаслиги маълум бўлди. Тадбир ташкилотчилари Жан Клод Ван Дамм бетоблиги туфайли кела олмаслиги, унинг ўрнига эса бошқа юлдуз яъни жанг санъати устаси Стивен Сигал ташриф буюришини маълум қилишди. Бироқ номаълум сабабларга кўра, спорт турнири Стивен Сигалнинг иштирокисиз ўтди.
Спорт турнирида микс-силат йўналишидаги 8та жанг ўтказилди. Уларнинг еттитасида ўзбекистонлик спортчиларнинг қўли баланд келди.
Биргина енгил вазн тоифасидаги вакилимиз Улуғбек Умаров афғонистонлик спортчига техник нокаут эвазига имкониятни бой бериб қўйди. Қолган 7 нафар спортчилар мусобақаларда ғалаба қозонишди.
Дастлаб Айюбхон Камолов ҳиндистонлик Викашни муддатидан аввал партердаги устунлик эвазига таслим этди. Кейин эса худди шундай усул эвазига Исроил Расулов сингапурлик Муҳаммад Каирини енгди.
Ҳасанхон Баратов россиялик Михаил Колдоркинни мағлуб этди.
Жасур Мирзамуҳаммедовнинг рақиби кипрлик спортчи бўлди. Жасур иккинчи раундда Вартан Апарянни мағлубиятга учрата олди.
Аҳлиддин Мирзадавлатов эса қозоғистонлик спортчини биринчи раундда таслим этди.
ММА йўналишида жаҳон чемпиони Маҳмуд Мурадов озарбайжонлик Зия Мирзаев устидан ғалаба қозонди.
Спорт турнирида эстрада хонандалари ҳам чиқиш қилди. Нилуфар Усмонова, Шоира Отабекова, Нилуфар, Муниса Ризаева каби хонандаларнинг қўшиқлари томошабинларга аъло кайфият бахш этди.
