Олий Лига 22-туридан ўрин олган "Локомотив" - "Пахтакор" (0:1) ўйинидан сўнг, "темирйўлчилар" устози Андрей Микляев ўз фикрларини билдирди.

"Жуда томошабоп ва қизиқарли ўйин гувоҳига айландик. Ҳар иккала жамоа ҳам шиддатли ўйин кўрсатди. Учрашув тақдирини ягона гол ҳал этиши эҳтимоли катта эди ва шундай бўлди ҳам. Бугун "Локо" футболчилари ҳам яхши ўйин кўрсатишди. Йигитлар борларини бериб майдонда ҳаракат қилишди. Бироқ ҳал қилувчи голни рақиб жарима зарбасидан киритиб кетди.

Ўйин борасида ҳеч кимга эътирозим йўқ. Негадир бугун якуний зарбалар беришда дадил ўйнай олмадик. Бикмаевнинг йўқлиги билинди. Мурод Бобожонов ёмон ҳаракат қилмади. Шунингдек, Олабиран Блессинг ҳам қўлидан келганча ўйнади. Олабиран ҳали ёш. У ҳали анча ўсишга эриша олади. Биз ҳозирда секин-аста ёш ўйинчиларимизни ўйнатишга эътибор қаратяпмиз. Мисол учун, бугун Азиз Амонов ҳам майдонга тушди. Охирги 2 та ўйинда рақиб дарвозасини ишғол эта олмадик. Бу борада ҳали яна ишлашимиз керак экан" - деди Микляев.