Италия терма жамоаси дарвозабони Жанлуижи Буффон ЖЧ-2018 финал қисми учун ўтиш учрашувида Швеция терма жамоасига қарши ўйинлар олдидан фикр билдирди.
Ушбу учрашувларнинг биринчиси 10ноябрь куни Стокгольмда ўтса, жавоб учрашуви 13 ноябрь куни Миланда бўлиб ўтади.
39 ёшли футболчи жаҳон чемпионатидан сўнг фаолиятини тугатишни кўзлаган, аммо италияликлар мундиалга чиқишлари учун Швеция тўсиғидан ўтишлари керак.
"Ҳаммаси кўнгилдагидай кечса, эртанги ўйин мен учун завқли бўлишига шубҳам йўқ. Бошқа вариантлар ҳақида ўйлагим йўқ. Ўтиш ўйинлари ўзига хос ва Швецияга қарши икки ўйинни ҳаяжонли бўлишига сабаб бўлади. Жаҳон чемпионатига йўлланмани биз ёки улар қўлга киритадилар. Ҳозир бизни ташвишлантираётган нарса шу.
Италия жаҳон чемпионатларида мунтазам қатнашадиган терма жамоа. Бу анънани давом эттиришимиз учун энг яхши ўйинимизни кўрсатишимиз керак", - дейди Буффон.
