«Арсенал» клуби бош мураббийи Арсен Венгер жамоа ярим ҳимоячиси Санти Касорланинг жароҳати борасида ўз фикрлари билан ўртоқлашди.

32 ёшли футболчи жамоа машғулотларига киришган, бироқ майдонга янги йил бошидагина қайтиши мумкин. Аввалроқ, футболчи ушбу жароҳат сабаб оёғидан айрилиб қолишига бир баҳя қолганини айтган эди.

«Ҳа, бу мен ўз фаолиятим давомида кўрган энг оғир жароҳат. Бу даҳшатли. Аммо Санти футболни қанчалик яхши кўришини биламан. У шуғулланишга уринмоқда.

Умид қиламанки, Касорла январдан сафимизга қайтади. Уни бошқа футбол ўйнай олмайди деганлар адашган деб умид қиламан», — дейди Венгер.