Футбол оламида охирги пайтларда шунақа воқеалар содир бўляптики, «Иложсиз нарсанинг ўзи йўқ», деган нақл ўз исботини топмоқда. Неймарнинг «Барселона»дан 222 млн евро эвазига кетиши, Коутиньонинг «Барселона»га келиши, хуллас, бундай шов-шувли воқеаларни истаганча келтириш мумкин. Ана шундай ҳодисалардан яна бири Роналду атрофидаги можаролардир.

АСЛИДА, САБАБ НИМА?

Месси «Барселона» билан янги шартнома имзолаб, маошини сезиларли даражада оширганидан кейин португалиялик футболчининг юрагига ғулғула оралади. Гўёки Роналду ўзини камситилгандек ҳис қилди. Тўғри, Мессининг маоши уникидан икки баравар кўп, эҳтимол, худди шу омил Криштианунинг ғашига тегаётгандир. Бироқ ойнанинг иккинчи томони ҳам бор.

Биринчидан, Месси ва Роналдунинг айни пайтдаги даражаси бир-биридан фарқ қилади. Месси 30 ёшда, Роналду эса 32 ёшни қаршилади. Табиийки, футболда ёш ҳам катта аҳамиятга эга. Қанчалик кўп шуғулланмасин, барибир, айни пайтда Роналдунинг майдондаги имкониятлари Мессиникидан пастроқ баҳоланади. Тезлиги ва бўйини ҳисобга олмаса, португалиялик юлдузнинг Мессидан устун жиҳати йўқ. Мессининг устун жиҳати эса бор — техника, дриблинг, жарима зарбаларини усталик билан амалга ошириш. Айнан шунинг учун ҳам Мессининг маоши Роналдуникидан кўп эканлигини адолатли деса бўлади.

Иккинчидан, Роналду бундан икки йил олдин ҳозирги Мессининг ўйинини кўрсатарди, эҳтимол, ундан яхшироқ ўйнарди ҳам. У пайтда Роналду жамоасининг ҳар томонлама — ҳам жисмонан, ҳам руҳан етакчиси эди. Яъни майдонда ҳам кўп ишни қойиллатарди, ҳам жамоасининг руҳиятини кўтариб турарди. Бугун эса Роналду майдонда фақат руҳий далда бўлмоқда, холос. Керакли вазиятлар голларни қалаштириб ташлайдиган ва жамоасининг жонига ора кирадиган Роналдуни ҳозир унчалик тополмаяпмиз йўқ. Бу «Сельта»га қарши ўйинда ҳам яққол билинди. Криштиану жамоасининг жонига ора кира олмади.

РОНАЛДУНИНГ ЎРНИ СУСАЙДИМИ? давоми