Германиянинг Spiegel журналининг маълум қилишича, "Реал" 2013 йилда "Тоттенҳэм"дан Гарет Бэйлни сотиб олишдан аввал "Барселона" ҳужумчиси Лионель Мессини 250 миллион еврога сотиб олмоқчи бўлган.
Агар бу келишув амалга ошганида дунё футболида рекорд бўлар эди.
Журналнинг ёзишича мадридликлар аргентиналик юлдузга бир мавсумда 23 миллион евро маош билан 2021 йилгача шартнома таклиф қилганлар. Мессининг отасига 1 миллион евро бонус ваъда қилинган.
Аммо "Реал" бу маълумотларни қатъий инкор қилмоқда: "Бу хабар ўйлаб топилган ва воқъеликка ҳеч қандай алоқаси йўқ".
Эслатиб ўтамиз, Мессининг "Барселона" билан янги шартномаси 2021 йилгача тузилган ва унинг учун тўланадиган товон пули 700 миллион евро қилиб белгиланган.
