Халқаро футбол тарихи ва статистикаси маркази IFFHS 2017 йилнинг энг яхши миллий чемпионатларни эълон қилди. Бу ҳақда ташкилот расмий сайтида маълум қилинган.
Рейтингга кўра Испания чемпионати 2017 йил дунёнинг энг яхши лигаси деб топилди. IFFHS талқинига кўра Ла-лига бу борада 2010 йилдан бери тенгсиз бўлиб келмоқда.
Англия премьер-лигаси 4 йиллик танаффусдан сўнг яна 2-поғонага қайтди. Бир йил олдинги рейтингда 7-ўринда қайд этилган Бразилия А серияси 2017 йилда 3-ўринда қайд этилди. Италия А серияси 4та ўрин юқорилаб 4-ўринга чиқиб олди. Франция чемпионати кейинги ўринни банд этди. Германия бундеслигаси эса рейтингда 8-ўринни эгаллаб, 1991 йилдан буён энг ёмон натижани қайд этди.
Шунингдек кучли ўнликдан Парагвай чемпионати (2016 йилда 17-ўриндан бу йил 9-ўринга кўтарилган) ва Россия премьер-лигаси (10та ўрин юқорилаб кучли 10-ўрин) ўрин олди.
Осиёда Жанубий Корея Кей-Лигаси қаторасига еттинчи йил қитъада тенгсиз бўлиб турибди. Ундан кейинги ўринда Саудия Арабистони чемпионати қайд этилган. Япония J-лигаси 9та ўрин кўтарилиб олган бўлса, Ўзбекистон Олий лигаси дунёда 70-поғонада (ўтган йили 78-ўрин) қайд қилинган. Бу Осиёда 8-ўрин деган. Олий лигадан олдинги ўринларда Хитой, Эрон, Таиланд ва БАА чемпионатлари ҳам бор. Ўзбекистондан пастда эса Қатар, Австралия, Ироқ ва Сурия каби мамлакат чемпионатлари жой олган.
Маълумот учун, IFFHS бу рейтинги чемпионатнинг энг кучли 5та клубининг ички ва халқаро мусобақалардаги натижаларидан келиб чиқиб олиб борилади.
