Аргентина терма жамоаси ва “Барселона” клуби ҳужумчиси Лионель Мессининг рекордлари ҳақидаги мақолани эътиборингизга хавола этамиз.
1. “Барселона” тарихидаги энг сермаҳсул тўпурар
Месси “Барселона” либосида 2004 йилдан буён 610 учрашувда майдонга тушиб ўз ҳисобига 529 та гол ёздириб қўйишга муваффақ бўлган. Лео каталонияликлар тарихидаги энг сермаҳсул футболчи бўлиб турибди. У рекордини янгилашда давом этмоқда ва бу рекорд яқин орада янгиланмаслиги аниқ!
2. Испания чемпионатидаги энг сермаҳсул тўпурар
Аргентиналик ҳужумчи Испания чемпионатида 2004 йилдан бери тўп суриб келмоқда. У ҳозирга қадар ла Лигада 400 ўйинда иштирок этиб 365 та голга муаллифлик қилган. Месси Премеро тарихидаги энг сермаҳсул тўпурар бўлиб турибди.
3. Испания чемпионатининг охирги 25 йилдаги энг яхши ассистенти
Месси Ла Лигада охирги 25 йил ичида энг кўп голли узатмани амалга оширган футболчи ҳисобланади. У 13 мавсум давомида шерикларига 130 та голли пас берган.
4. “Эл-класико” тарихидаги энг сермаҳсул тўпурар
Лео “Эл-класико”ларда 34 марта майдонга тушиб 25 бора Мадридлик посбонларни ранжитишга муваффақ бўлган. 30 ёшли ҳужумчи “Реал” – “Барса” ўйинларида энг кўп гол урган футболчи сифатида ҳам тарих саҳифаларидан жой олди.
5. “Эл-класико”лардаги энг яхши ассистент
Месси “эл-класико”лардаги нафақат энг яхши тўпурар, балки энг яхши ассистент ҳамдир. У “Реал”га қарши ўйинларда 15 марта шерикларини голли узатма билан таминлаб, бу борада ҳам реcорд ўрнатган.
