Чемпионликка эришиб бўлган «Барселона», чемпионатни четга суриб қўйиб, ЕЧЛга эътиборини қаратган «Реал». Бутун дунё орзиқиб кутадиган «Эль-Класико» бу сафар турнир нуқтаи назаридан шундай интригасиз бошланди.
Жамоаларда мотивация уйғотадиган балки битта факт бор эди – «Барселона»нинг Ла Лигадаги мағлубиятсиз серияси. Каталонияликлар бир вақтлар «Арсенал» кўрсатган натижани – мавсумни мағлубиятсиз якунлаш рекордини такрорлашга уриниши аниқ. Олдинда саноқли ўйинлар қолди. «Реал»да эса энг асосий рақибини шундай зафарли юришдан тўхтатиб қолиш имкони юзага келганди.
Учрашувни жамоалар хотиржам бошлашди. Жиддий асабий тўқнашувларсиз ўтган илк дақиқаларда майдон эгалари тезкор гол киритишга муваффақ бўлдилар. Тезкор қарши ҳужумни Суарес ажойиб тарзда мантиқий якунига етказди. Орадан кўп вақт ўтмай, «Реал» рақибиникидан қолишмайдиган чиройли комбинация уюштирди ва Роналду ҳисобни тенглаштирди.
Мухлислар чиройли ўйин гувоҳи бўлишга шайланиб турган бир вақтда учрашув бош ҳаками Эрнандес катта саҳнага чиқа бошлади. Майдонда фолларни баҳолашда хатоларга йўл қўя бошлади ва бу ҳолат футболчиларнинг асабийлашишига олиб келди. Бир нечта сариқ карточкалар ва бўлим охирларида «Барселона» ҳимоячисига кутилмаганда қизил карточка кўрсатиб майдондан чиқариб юборди.
Биринчи бўлимда йўл қўйган хатоларидан ўзини айбдор ҳис қила бошлади чоғи, ҳакам иккинчи таймда энди тескари томонга нисбатан кўпроқ хато қила бошлади.
Ўйин шу тарзда асабий ўтган бўлса-да, иккинчи бўлимда киритилган голлар учрашув безагига айланди. Аввалига Месси ўз маҳоратини намойиш этиб, стадионни ларзага келтирган бўлса, кейин Бэйл жуда чиройли гол киритди. Ўйин шундай жанговор дуранг билан якунига етди.
Бир жиҳатдан бу икки жамоани ҳам қониқтирди – «Барселона» мағлубиятсиз серияни ушлаб қолган бўлса, Қироллик клуби «Камп Ноу»дан ютқазмасдан қайтди. Дарвоқе, бу борада Зайниддин Зиданнинг ҳам ўзига хос серияси бор: у «Реал»ни қабул қилиб олганидан буён «Камп Ноу»да мағлуб бўлмаяпти.
Барселона – Реал Мадрид – 2:2
Голлар: 1:0 – 10 Суарес, 1:1 – 14 Роналду, 2:1 – 52 Месси, 2:2 – 72 Бэйл.
Барселона – тер Штеген, Умтити, Пике, Альба, Коутиньо (Нелсон Семеду, 46), Сержи Роберто, Бускетс, Ракитич, Иньеста (Паулиньо, 58), Месси, Суарес (Пако Алькасер, 90).
Реал Мадрид – Навас, Варан, Марсело, Начо (Васкес, 68), Рамос, Модрич, Каземиро, Кроос (Ковачич, 84), Бэйл, Роналду (Асенсио, 46), Бензема.
Огоҳлантиришлар: Начо (12), Варан (31), Суарес (44), Рамос (44), Месси (45), Бэйл (76), Марсело (77), Ракитич (85).
Четлатиш: Сержи Роберто (45).
