"Реал" ҳужумчиси Криштиану Роналду фаолиятини давом эттириш учун катта танловга эга эмас.

"Қироллик клуби" футболчини 200 миллион еврога сотишга тайёр. Аммо португалиялик ҳужумчи 35-40 млн евро атрофида йиллик маош талаб қилаётганини инобатга олсак, унинг трансферини унча-мунча жамоа кўтара олмайди. Криштиану кўчиб ўтиши мумкин бўлган 2та жамоа бор. Улар — "ПСЖ" ва "Манчестер Юнайтед".

ПСЖ
Париж шаҳри клуби молиявий фейр-плей қоидаси бўйича УЕФАнинг қарорини кутмоқда. Ҳаттоки "ПСЖ" жиддий жазога тортилмаса ҳам, жамоа ўзининг юлдуз футболчиларидан бирини сотмасдан туриб, Криштиану билан шартнома имзолай олмайди. Парижликлар ўзларининг порлоқ келажакка эга футболчиси — Килиан Мбаппени сотишмаса керак. Жамоа "Реал"га Неймарни бериб, устига қўшимча пул олиши мумкин. Мана шу вариант ҳақиқатга яқинроқ.

"Манчестер Юнайтед"
Шунингдек, "Манчестер Юнайтед" ҳам Роналдунинг трансферини амалга оширишга қодир. Улар португалиялик юлдузни сотиб олиш учун етарли маблағга эгалар. Боз устига, Криштианунинг ўзи ҳам собиқ клубига қайтишга қарши эмас. Бу ерда ҳамма гап Жозе Моуриньода қолган. Унга ватандоши керакми? Сўнгги пайтларда футболчи ва мураббий ўртасидаги муносабатлар аъло даражада деб айтиш қийин.

"Бавария", "Ювентус", "Манчестер Сити"
Назарий жиҳатдан "Бавария", "Ювентус" ва "Манчестер Сити" клублари ҳам иқтисодий жиҳатдан Роналду билан шартнома имзолаш имкониятига эгалар. Аммо ушбу клубларнинг сиёсати Криштиану харид қилишга тўсқинлик қилади. Мюнхенликлар ҳеч қачон нархи 100 миллион евродан баланд футболчиларни сотиб олишмайди. Криштиану Туринга келиш учун камроқ ойлик маошга рози бўлиши керак. Пеп Гвардиолага эса Криштиану Роналду керак эмас.

Бошқа вариантлар
Қатар, Япония, Хитой ва МЛС – Роналду фаолиятини давом эттириши мумкин бўлган мамлакатлар сафида тилга олиниши мумкин. Аммо португалиялик футболчининг ўзи яна бир неча йил Европада ўйнашни истамоқда. Шу орқали у юқори савиядаги жамоавий ва индивидуал совринларни қўлга киритиши мумкин.