Эътибор бераётган бўлсангиз, сўнгги вақтларда мамлакатимизда спортни ривожлантиришга энг қуйи бўғиндан бошлаб эътибор қаратилмоқда. Жисмоний тарбия ва спортни айнан мактабгача таълим муассасасининг жажжи болажонлари ўртасида оммалаштириш келажакда янгидан-янги номларни, Олимпия ва жаҳон чемпионларини етиштиришда муҳим аҳамият касб этади. Бу борада Ўзбекистон миллий олимпия қўмитаси бўлажак спортчилар учун турли тадбирлар ташкил этиб келмоқда.
Ана шундай тадбирлардан бири бугун Сирдарё вилояти Гулистон шаҳридаги 31-сонли «Қувонч» боғча-мактаб мажмуасида ташкил қилинди. Ўзбекистон спорт курашлари ассоциацияси билан ҳамкорликда ўтказилган ушбу тадбирда миллий терма жамоа аъзолари ҳам иштирок этишди. Унда мамлакатимизнинг етакчи полвонлари ёш спортчилар учун ўз маҳоратларини намойиш этдилар. Ўз ўрнида, болажонлар бу тадбирдан бир олам таассурот олганликларини алоҳида таъкидлаш лозим. Самимий рухда кечган маҳорат сабоқлари давомида ёш болакайлар кураш гиламида илк қадамларини ташлашди. Ажаб эмаски яқин келажакда улар орасидан ўзбек спорти юлдузлари етишиб чиқса.
