29-30 июнь кунлари Хорватиянинг Умаг шаҳрида каратэ бўйича Буэнос-Айресдаги ўсмирлар Олимпия ўйинларига лицензия берувчи мусобақа бўлиб ўтди. Унда 84 мамлакатдан 325 нафарга яқин спортчи иштирок этди.
Баҳсларда терма жамоамиз шарафини Дилдор Алиқулова (-53кг), Бону Эгамбердиева (-59кг), Шохрух Турсунмахамматов (-61кг), Саидислом Жўраев (-68кг), Шахзоджон Боймухаммедов (+68 кг) каби спортчилар ҳимоя қилишди.
Қайд этиш лозимки, мусобақа терма жамоамиз учун омадли келди. Ушбу ёш тоифасидаги спортчиларимиз Осиё чемпионатида кўнгилдагидек натижани қайд эта олишмаганди. Буни қарангки, Хорватиядаги лицензион мусобақада ўзбек спортчиси ўзига юклатилган вазифани бажара олди. -53 кг вазн тоифасида мусобақада иштирок этган юртдошимиз Дилдор Алиқулова мусобақа давомида Бельгия (6:1), Чехия (0:0, ҳакамлар қарорига кўра), Озарбайжон (4:0) каби мамлакат вакилларини мағлубиятга учратиб, ярим финалга йўл олди. Финал йўлланмаси учун кечган қийин баҳсда у Буюк Британия вакиласини мағлуб этди (4:3) ва финал чиптасини қўлга киритиш билан бирга, Аргентинада бўлиб ўтадиган ўсмирлар Олимпия ўйинлари лицензияси соҳибасига ҳам айланди. Финалда эронлик рақибга қарши кечган жангда у 1:2 ҳисобида имкониятни бой берди.
Шу тариқа спортчимиз лицензион мусобақанинг кумуш медали соҳибасига айланди.
Маълумот учун, ушбу мусобақада биринчи ва иккинчи ўрин соҳиблари Буэнос-Айрес йўлланмасини қўлга киритадилар.
Миллий олимпия қўмитаси ушбу муваффақият билан Ўзбекистон каратэ Миллий федерациясини, шунингдек, спортчи ва мураббийларимизни табриклайди ва Аргентинадаги Олимпия ўйинларида омад тилайди.
Шу тариқа, Аргентина Олимпиадасига йўлланмаларимиз сони 24тага етди. Бугунги кунга келиб III ёзги ўсмирлар Олимпия ўйинлари учун терма жамоамиз ҳисобида қуйидаги спорт турларида лицензиялар мавжуд:
Спорт курашлари – 5та
Оғир атлетика – 3 та
Байдарка ва каноэда эшкак эшиш – 3 та
Академик эшкак эшиш – 3 та
Спорт гимнастикаси – 2 та
Спорт акробатикаси – 2 та
Трамполин - 1
Бадиий гимнастика – 1 та
От спорти (конкур) – 1 та
Таэквондо – 1 та
Бокс – 1 та
Каратэ – 1 та.
Эслатиб ўтамиз, III ёзги ўсмирлар Олимпия ўйинлари 6-18 октябрь кунлари Аргентинанинг Буэнос-Айрес шаҳрида бўлиб ўтади.
