Италиянинг “Ювентус” ҳужумчиси Криштиану Роналду терма жамоага чақирилмасликни сўради. Бу ҳақда Footbal Italia хабар бермоқда.
33 ёшли футболчи Португалия термасининг сентябрь ойидаги Миллатлар лигаси ўйинларига жалб этилмаган, бу “Ювентус”га тезроқ кўникиб кетишига ёрдам бериш мақсади билан изоҳланган эди.
Манбага кўра, ҳужумчи октябрь ва ноябрь ойларидаги йиғинларга ҳам жалб этилмайди. Шу тариқа, у октябрь ойида Миллатлар лигаси доирасидаги Польшага қарши баҳс (11 октябрь) ва Шотландия билан ўртоқлик ўйинини (14 октябрь) ўтказиб юборади.
Ноябрда эса Миллатлар лигасининг яна икки баҳси – Италия (17 ноябрь) ва Польша (20 ноябрь) билан учрашувларда Португалия термаси Роналдунинг хизматидан фойдаланмайди.
