«Барселона» ҳужумчиси Лионель Месси душанба кунидан тикланиш жараёнини бошлади. Эслатиб ўтамиз, 31 ёшли футболчи "Севилья"га қарши бўлиб ўтган ўйинда ўнг қўлининг билак суягини синдириб олганди.
Қўлидаги оғриқ туфайли аргентиналик футболчи кечаси яхши ухлай олмаяпти. Шифокорлар Мессига сабр қилиш кераклигини таъкидлашди. «Барселона» шифокорлари операция шарт эмас, деган хулосага келишди. Уларнинг тахминига кўра, футболчининг тўлиқ тикланиши учун 3 ҳафта вақт кетади.
Клуб тизимида ишламайдиган врачларнинг фикрича, тикланиш жараёни 3 ҳафтадан кўпроқни ташкил қилиши мумкин.
Месси 28 октябрь куни бўладиган «Реал»га қарши ўйинни ҳамда, «Интер» билан ЕЧЛ доирасида жавоб баҳсини ўтказиб юборади.