Бугун "Навбаҳор" клуби қароргоҳида тезкор йиғилиш ўтказилди. Унда Наманган вилояти ҳокими Хайрулла Ҳайитбоевич Бозоров, шаҳар ҳокими Шавкат Шокиржонович Абдураззоқов ва клуб вице-президенти Шамшод Эргашович Сариков ҳамда клуб мураббийлар штаби ва футболчилар иштирок этишди. Бу ҳақда "Навбаҳор" мухлислар клубининг телеграмдаги саҳифаси хабар тарқатди.

Йиғилишда бир қатор масалалар муҳокама қилинди. Жумладан, футболчилар томонидан муаммо йўқлиги, барчаси аъло даражада эканлиги эътироф этилди. Раҳбарлар эса «Пахтакор» билан бўладиган учрашувда фақат ва фақат ғалаба қозониш кераклигини вазифа қилиб белгилашди.

"Чемпионатда ҳали ҳеч нарса ҳал бўлгани йўқ. Қолган учрашувларда максимал натижа қайд этиб, кўзланган мақсадга эришиш мумкин. Сафарда ҳам «Навбаҳор»нинг ғалабали сериялари бошланиш вақти келгандур? Чунки охирги пайтларда меҳмондаги учрашувларда ҳам ҳудди «Навбаҳор» ўз майдонида ўйнаётгандей хис қилмоқда. Демак мухлислар ёлғизлатиб қўймайди. Бунга жавобан «Навбаҳор» сафарда ҳам ғалабали серияларни бошлаши лозим! Мухлислар ўз суюклиларини ҳеч қачон ёлғизлатиб қўймайди хоҳ уйда, хоҳ сафарда бўлсин. Шундай экан «Навбаҳор» ҳам, мухлислар ҳам асло чекинмайди. Мен албатта ишонаман, 1 ноябрь куни «Пахтакор» мухлисларидан «Навбаҳор» мухлислари кўп бўлади", — дея таъкидлади вилоят ҳокими Хайрулла Бозоров.