Bugun "Navbahor" klubi qarorgohida tezkor yig‘ilish o‘tkazildi. Unda Namangan viloyati hokimi Xayrulla Hayitboyevich Bozorov, shahar hokimi Shavkat Shokirjonovich Abdurazzoqov va klub vise-prezidenti Shamshod Ergashovich Sarikov hamda klub murabbiylar shtabi va futbolchilar ishtirok etishdi. Bu haqda "Navbahor" muxlislar klubining telegramdagi sahifasi xabar tarqatdi.

Yig‘ilishda bir qator masalalar muhokama qilindi. Jumladan, futbolchilar tomonidan muammo yo‘qligi, barchasi a’lo darajada ekanligi e’tirof etildi. Rahbarlar esa «Paxtakor» bilan bo‘ladigan uchrashuvda faqat va faqat g‘alaba qozonish kerakligini vazifa qilib belgilashdi.

"Chempionatda hali hech narsa hal bo‘lgani yo‘q. Qolgan uchrashuvlarda maksimal natija qayd etib, ko‘zlangan maqsadga erishish mumkin. Safarda ham «Navbahor»ning g‘alabali seriyalari boshlanish vaqti kelgandur? Chunki oxirgi paytlarda mehmondagi uchrashuvlarda ham huddi «Navbahor» o‘z maydonida o‘ynayotgandey xis qilmoqda. Demak muxlislar yolg‘izlatib qo‘ymaydi. Bunga javoban «Navbahor» safarda ham g‘alabali seriyalarni boshlashi lozim! Muxlislar o‘z suyuklilarini hech qachon yolg‘izlatib qo‘ymaydi xoh uyda, xoh safarda bo‘lsin. Shunday ekan «Navbahor» ham, muxlislar ham aslo chekinmaydi. Men albatta ishonaman, 1 noyabr kuni «Paxtakor» muxlislaridan «Navbahor» muxlislari ko‘p bo‘ladi", — deya ta’kidladi viloyat hokimi Xayrulla Bozorov.