Спортчи Тошкент шаҳридаги “Тошкент” савдо марказида бугун, 26 ноябрь куни пичоқлаб кетилди.

Яккакураш спорт турининг аралаш тури бўйича жаҳон чемпиони Мурод Хонтўраев Тошкент шаҳридаги “Тошкент” савдо марказида пичоқлаб кетилди. Воқеа бугун, 26 ноябрь куни содир этилган. Ҳозирда Мурод Хонтўраев Тошкент шаҳар 1-сонли клиник шифохонасига олиб келиб жойлаштирилган.

Ушбу ҳолат бўйича Ички ишлар органлари ходимлари томонидан жиноят иши очилган, тергов ҳаркатлари олиб борилиши устидан прокуратура назорати ўрнатилган.

Мурод Хонтўраев шу йилнинг 21 июнига ўтар кечаси Юнусобод тумани ҳудудидаги тунги клуб рўй берган можаро иштирокчиси бўлган, у кўкрак қисмига пичоқ билан берилган зарбадан жароҳат олганди. У кейинроқ шифохонадан милицияга сўроқ бериш учун олиб кетилган, суд ҳукми билан қамоққа олинган эди.

Суд Хонтўраевни ЖК 277-моддаси 3-қисми “а” банди (такроран ёки хавфли рецидивист томонидан безорилик содир этилиши) бўйича айбдор деб топган. Аввалроқ Хонтўраевга 3 йиллик қамоқ жазоси хавф солаётганди. 12 октябрь куни Жиноят ишлари бўйича Яккасарой тумани судида Мурод Хонтўраевга жарима тарзида жазо қўллаган бўлиб, спортчи энг кам ойлик иш ҳақининг (172 240 сўм ҳисобида) 94 баравари миқдорида жарима (16 190 560 сўм) тўлаб, озодликка чиқди.

Мурод Хонтўраев 1987 йилда Тошкент шаҳрида туғилган. Оилали ва икки нафар фарзанди бор.