Ўзбекистон миллий терма жамоаси яна бир ойдан кейин БААда бўлиб ўтадиган Осиё кубогида иштирок этади. Шу муносабат билан бугун Ўзбекистон футбол ассоциацияси мажлислар залида терма жамоамиз бош мураббийи Эктор Купер билан матбуот анжумани ўтказилди.

— Австралиядаги йиғиндан кейин саволлар кўпайиб кетди. Австралиядаги 2та ўйинда натижа салбий бўлди. У ерда кўп хатоларга йўл қўйдик. Мағлубият ёқимсиз бўлгани билан унинг фойдали томонлари бор. Мураббий бу хатолардан тўғри хулоса чиқариб оламиз. Осиё кубогидан умидим катта. Ушбу мусобақага яхши формада етиб келамиз, деган умиддаман.

— Ўртоқлик ўйинларида натижа муҳим эмас. Буни биламиз. Аммо Австралиядаги 2та баҳсда ўйинимиз ҳам нурсиз бўлди. Ўтказилган бир нечта ўртоқлик учрашувлари қандайдир хулосалар чиқариш учун етарли бўлдими?

— Ўртоқлик ва расмий ўйинлар деб ажратмайман.Ўртоқлик ўйинларида кўп нарсаларни синаб кўриш мумкин. Биз ҳар қандай ўйинга жиддий ёндашамиз. Корея билан ўйинларда ўйлаган режаларимиз амалга ошмади. Ўйинимизга тўхталадиган бўлсам, сизга бир мисол келтираман. Франция терма жамоаси ҳимоявий ўйин орқали чемпионликни қўлга киритди. Уларнинг ўйини ҳеч кимга ёқмади. Аммо улар соврин қўлга киритишди. Менинг ўйиним сизга ёқмаётган бўлиши мумкин. Лекин бизга аввало натижа керак. Агар қаердадир хато қилаётганимни сезсам, буни дарҳол тан оламан ва ўзгартиришга ҳаракат қиламан. Осиё кубогида биз бутунлай ўйин намойиш қилишимиз ҳам мумкин.

— Ноябрдаги йиғинда терма жамоа таркиби оптималга яқин бўлди, бироқ натижа борасида энг ёмон натижалар қайд этдик. Демак, Осиё кубогига йўл оладиган таркибда яна ўзгаришлар бўлиши мумкинми?

— Осиё кубогига таркиб танлашда фақатгина ноябрь ойидаги йиғинга урғу бермаймиз. Аввалги йиғинлар орқали футболчилар ҳақида етарли хулосаларга чиқарганмиз. Декабрь ойида 15 кунлик йиғин ўтказамиз. Сиз хаёлингизга келмаган футболчилар Осиё чемпионатига бориши мумкин. Бизда терма жамоага номзод футболчилар базаси мавжуд.

— Ливанга қарши ўйинда ҳужумкор ўйин кутгандик, аммо терма жамоамиз кўпроқ ҳимояга эътибор қаратди ва деярли хавфли вазият ярата олмади. Осиё кубоги гуруҳ босқичида бизга нисбатан 2та кучсиз терма бор. Уларга қарши ўйинларда ҳам ҳимоявий ўйинга урғу бериладими? Бизда захирада ҳужумкор ўйин услуби ҳам борми?

— Назарий жиҳатдан, қайсидир ўйиндан олдин рақиб бизга нисбатан кучсиз кўриниши мумкин. Аммо ҳар бир рақибга ҳурмат билан ёндашиш мумкин. Мен ўйин услубимни ҳимоявий ёки ҳужумкор деб айта олмайман. Мен учун энг муҳими мувозанат бўлиши керак. Лекин аввало ҳимояда тартибли ўйин намойиш қилишимиз керак. Сизни хотиржам қилишим мумкинки, бизда "В" режа ҳам бор.

— Ўзбекистонга келишдан олдин бизнинг футболчилар ҳақида қандай тасаввур бор эдию, ҳозирда қандай хулосага келдингиз?

— Одатда мураббийлар таркиб танлашда иккита муаммога дуч келиши мумкин: ё савияли футболчи етишмаслиги туфайли, ёки яхши футболчилардан ҳаддан ташқари кўплиги боис. Сизни ҳозирда қандай муаммо қийнамоқда.

— Мен буни муаммо деб ҳисобламайман. Ихтиёримда бор футболчилардан келиб чиқиб жамоа тузаман. Масалан, Германияда кучли футболчилар ҳаддан ташқари кўп, аммо улар ЖЧда гуруҳдан чиқа олишмади. Яна бир марта такрорлайман, биз таркиб борасида ҳам мувозантга эришишимиз керак.

— Осиё кубогида қандай натижа сиз учун қониқарли ҳисобланади.

— Осиё кубогида ғолибликни қўлга киритиш.

— Қанот ҳимоячиларимиз Суперлига ўйинларида яхши ўйин кўрсатадию, аммо терма жамоа сафида халқаро учрашувларда рақиб ҳужумларини яхши ёпа олишмайди. Бунинг сабаби нимада? Чемпионатимиз савияси пастми?

— Тактика ҳақида гапирадиган бўлсам, бу катта мавзу. Тактика танлашдан олдин жамоанинг ҳолатидан келиб чиқади. Масалан, қайсидир мураббий "Барселона"да қўллайдиган услубни бошқа жамоада қўллашнинг иложи йўқ. Кўп нарса футболчиларнинг маҳоратига боғлиқ. Миллий чемпионат ўйинларини кузатяпман. Қанотдан ҳужумга қўшиладиган яхши футболчилар бор. Аммо бу ҳаммаси зўр дегани эмас. Фақатгина бу билан чекланиб қолмаслиги керак.

— Сиз талаб қилаётган нарсаларни футболчилар қанчалик тўғри қабул қилишяпти. Ўйинчилар билан қандай вазиятда суҳбатлашасиз.

— Ўйинчилар мен талаб қилаётган услубни бажара олишга қодир. Бунга кўзим етяпти. Агар ўйинчи қила олмаслигига кўзим етса, ўзгартириш киритаман. Футболчилар қандайдир ишларни бажара олмаётганига ишонч ҳосил қилсам, захира вариантларимиз бор. Улардан фойдаланамиз.

— Ўртоқлик учрашувларидаги барча ўйинларимиз деярли бир хил чиқди. Осиё кубогида ўйин борасида янгилик кутамизми ёки фақат шундай услубда ўйнаймизми?

— Ҳар қандай терма жамоанинг ўз ўйин услуби бўлиши керак. Кўп ўйин услуби бўлиши ҳам тўғри эмас. Осиё кубогида бошқача услубда ўйнаймиз. Сизларни тушуниб турибман, кўпчилик хавотирга тушиб қолган. Режалаштирган ишларим бинойидек кетса, мусобақада ғолиб чиқишимиз ҳам мумкин. Мен мусобақага оптимистик руҳда ёндашяпман. Иложсиз нарсанинг ўзи йўқ. Футболда ўртоқлик ўйинларида ёмон натижа кўрсатган жамоа расмий баҳсларда бутунлай бошқача ўйин кўрсатиши мумкин. Бу нормал ҳолат.