Миср пойтахти Қоҳира шаҳрида оғир атлетика бўйича қизлар ўртасида халқаро турнир ўтказилди.

Олимпия ўйинларига рейтинг очколарини жамғариш имконини берадиган ушбу турнирда юртимиз шарафини Муаттар Набиева, Кумушхон Файзуллаева, Долера Давронова ва Турсуной Жабборовалар ҳимоя қилишди.

Бунгача мусобақада иштирок этган ҳамюртларимиздан Муаттар Набиева -55 кг вазн тоифасида мутлақ ғолибликни қўлга киритиб, учта олтин медални, Турсуной Жабборова -76 кг вазн тоифасида бронза медални қўлга киритишган эди.

Бугун ўтказилган баҳсларда -87 кг вазн тоифасида иштирок этган спортчимиз Долера Давронова даст кўтаришда даст кўтаришда 83 кг., силтаб кўтаришда эса 113 кг. тошни ўзига бўйсундирди ва иккита олтин медаль соҳибасига айланди.

Ўзбекистон аёллар терма жамоаси Мисрдаги чиқишларини 5 та олтин ва 1 та бронза медаллари билан якунлашди.