Покистоннинг Лаҳор шаҳри мезбонлик қилаётган чим устида хоккей спорт тури бўйича эркаклар ўртасидаги “Hockey Series Open” халқаро турнирининг биринчи босқичида Ўзбекистон терма жамоаси Афғонистон вакилларини йирик ҳисобда мағлубиятга учратди.
17-22 декабрь кунлари ўтказиладиган мусобақада Ўзбекистон терма жамоаси 18 декабрь куни ўзининг биринчи учрашувини ўтказди ва афғонистонлик хоккейчиларга қарши майдонга тушиб, 11-0 ҳисобида зафар қучди.
Энди Ўзбекистон терма жамоаси биринчи босқичдаги қолган гуруҳдошлари: Қозоғистон, Непал терма жамоаларига қарши баҳс олиб боради. Жамоа 20 декабрь куни Непал жамоаси билан баҳслашса, 22 декабрь куни Қозоғистон жамоасига қарши ўйин олиб боради.
Гуруҳда биринчи ўринни қўлга киритган жамоа 2019 йил Ҳиндистонда бўлиб ўтадиган ушбу турнирнинг финал босқичига йўлланма олади. Ҳиндистондаги финал босқичида Токио-2020 Олимпиадаси учун йўлланма соҳиблари аниқланади.
