Жорий йилнинг 15-17 декабрь кунлари Урганч шаҳридаги “Ёшлик” спорт мажмуасида бадиий гимнастика бўйича Ўзбекистон очиқ чемпионати бўлиб ўтди.

Ўзбекистон Жисмоний тарбия ва спорт вазирлиги ва Гимнастика федерацияси ҳамкорлигида ташкил этилган мусобақада Ўзбекистоннинг турли ҳудудларидан ташриф буюрган 17 та жамоадан 500 нафарга яқин гимнастикачилар олти номинациядаги медаллар учун беллашишди.

Уч кун давом этган мусобақада 14 ёшгача бўлган қизлар, аралаш ва 45 ёшдан юқори бўлган аёллар жамоалари тайёрлаган композициялар ижро маҳорати, рақс ва гимнастика элементларини бажариш қобилияти бўйича баҳоланди.

Мусобақада гимнастика билан мунтазам шуғулланаётган спортчилар билан бирга мактаб ва коллежлар ўқувчилари, уй бекалари, корхона ва ташкилотлар ходимлари ҳам иштирок этди.

Мусобақа бош соврини – Ўзбекистон гимнастика федерацияси кубогини пойтахтнинг “Эвикидс” жамоаси қўлга киритди.

Бундан ташқари “Ёшлик” (Хоразм), “Шумтакалар” (Жиззах), “Янги кун” (Нукус), “Стар” (Самарқанд), “Дўстлик” (Андижон), “Боғишамол” (Навоий) ва “Шўх қизлар” (Жиззах) жамоаларининг чиқишлари юқори баҳоланиб, турли номинацияларда совринлар билан тақдирланди.