ПСЖ» «Реал» яримҳимоячиси Искога қизиқиш билдирмоқда.

Paris United`нинг хабар топишича, Париж клуби президенти Носир Ал-Ҳелаифи хавбекнинг отаси ва агенти Пако Аларкон билан учрашган. Агент билан нафақат «ПСЖ», балки «Барселона», «Ювентус», «Манчестер Юнайтед» ва «Челси» каби клублар ҳам алоқага чиқишган.

Қайд этилишича, «Реал» бош мураббийи Сантьяго Солари билан келишмовчилиги сабаб Мадриддан кетишни истаётган Искога айнан «ПСЖ» варианти кўпроқ ёқяпти. Боиси жамоадоши Карим Бензема унга Париждаги ҳаётни роса мақтаб тасвирлаб берган.

Шу билан бирга, Франция чемпиони учун Искони сотиб олиш осон кечмайди. Испанияликнинг трансфер бозоридаги нархи анча юқори, уни харид қилгудек бўлишса, французлар молиявий фэйр-плей қоидалари билан боғлиқ муаммоларга дуч келиши мумкин.

Жорий мавсумда Иско Испания чемпионатининг 11 ўйинида қатнашиб, битта гол ва иккита самарали тўп узатиш билан чекланмоқда. Унинг «қиролли клуби» билан шартномаси 2022 йилгача мўлжалланган.