Мамлакатимизда жисмоний тарбия ва спортни ривожлантириш, ёшлар ўртасида олимпиада ҳаракатини тарғиб этишдаги фаол иштироки, Рио-де-Жанейро (Бразилия) шаҳрида бўлиб ўтган XXXI ёзги Олимпиада ўйинларидаги юксак спорт маҳорати ва мардлиги, халқаро спорт майдонларида Ўзбекистоннинг нуфузи ва обрў-эътиборини оширишга қўшган ҳиссасини инобатга олиб Фазлиддин Ғоибназаров “Жисмоний тарбия ва спорт аълочиси” кўкрак нишони билан тақдирланди.
Таниқли спортчимизга мазкур мукофотни Жисмоний тарбия ва спорт вазири Дилмурод Набиев топширди.
Вазир Дилмурод Набиев Фазлиддин Ғоибназаровга юртимиз довруғини дунёга танитиш йўлидаги саъй-ҳаракатлари учун миннатдорчилик билдириб, спортчимизнинг ютуқлари ёшларимиз орасида боксга, умуман спортга бўлган қизиқишнинг ортишига хизмат қилаётганини таъкидлади ҳамда вазирлик бундан кейин ҳам боксчимизни ҳар томонлама қўллаб-қувватлашга тайёр эканлигини маълум қилди.
Эндиликда профессионал бокс билан жиддий шуғуллана бошлаган Фазлиддин Ғоибназаров ўзининг дастлабки бир неча жангини муваффақиятли ўтказиб, кўзланган мақсад сари – жаҳон чемпионлигини қўлга киритиш учун дадил қадам ташламоқда. Шунинг баробарида у юртимизда соғлом турмуш тарзини қарор топтириш, ёшларни спортга кенг жалб этиш борасида амалга оширилаётган ишларда ҳам жуда фаол.
Эслатиб ўтамиз, Фазлиддин Ғоибназаров 19 январь куни Нью-Йоркда доминиканлик боксчи Рикардо Гарсияга қарши жанг ўтказиб, рақибини учинчи раунддаёқ таслим этиб, ғалаба қозонди. У ҳозиргача профессионал боксда ўтказган барча еттита жангида ғалаба қозонган, тўрт марта рақибларини нокаутга учратган.
