«Реал» ҳужумчиси Карим Бензема Испания кубогининг чорак финал босқичи доирасида «Жирона»га қарши бўлиб ўтган жавоб баҳсида иккита гол урди.

Франциялик футболчининг "Қироллик клуби" сафидаги жами голлари сони 209тага етди. У Ла лигада — 136, ЕЧЛда — 47, Испания кубогида — 20, Клублар ўртасидаги ЖЧда — 3, Испания суперкубогида — 2 ва УЕФА суперкубогида 1та голга муаллифлик қилган.

Шу тариқа, Карим «Реал» тарихидаги тўпурарлар рўйхатида 6-ўринга кўтарилиб олди. Бензема 208та гол урган Уго Санчесни ортда қолдирди.

Фактлар:
— Тўпурарлар рўйхатининг бешинчи поғонасини 237та гол билан Ференц Пушкаш эгаллаб турибди.
— Тўртинчи ўриндаги Карлос Сантильяна ҳисобида 288та гол мавжуд.
— Кучли учлик эса Криштиану Роналду (451), Рауль (323), Альфредо Ди Стефано (307)дан иборат.