Жисмоний тарбия ва спорт вазирлиги томонидан норматив-ҳуқуқий ҳужжатлар лойиҳалари муҳокамаси порталига Ўзбекистон Республикасининг Президентининг “Қишки спорт турларини ривожлантириш чора-тадбирлари тўғрисида”ги қарори лойиҳаси жойлаштирилди.
Лойиҳага кўра, Ўзбекистон Республикаси Жисмоний тарбия ва спорт вазирлиги Олий ва ўрта махсус таълим вазирлиги билан биргаликда 2019/2020 ўқув йилидан бошлаб:
Ўзбекистон давлат жисмоний тарбия ва спорт университетида қишки спорт турлари бўйича кафедра ташкил қилади;
Ўзбекистон давлат жисмоний тарбия ва спорт университетининг бакалавр йўналишига ажратилган қабул квоталарини йўналишлар бўйича тақсимлашда қишки спорт турлари учун ўрин ажратилиши юзасидан таклифларни Ўзбекистон Республикаси таълим муассасаларига ўқишга қабул қилиш бўйича давлат комиссиясига тасдиқлаш учун киритади.
Шунингдек, Олий ва ўрта махсус таълим вазирлигининг Касб-ҳунар таълими маркази тасарруфида касб-ҳунар коллежлари бўлган вазирликлар ва идоралар билан биргаликда 2019/2020 ўқув йилидан бошлаб идоравий мансублигидан қатъи назар касб-ҳунар коллежларида спорт иншоотларига ва қишки спорт турлари бўйича хизмат кўрсатиш бўйича йўналишлар ташкил қилади.
Бундан ташқари, Ўзбекистон Республикаси Инновацион ривожлантириш вазирлиги Соғлиқни сақлаш вазирлиги ва Жисмоний тарбия ва спорт вазирлиги билан биргаликда 2019 йилдан Ўзбекистонда қишки спорт турларини ривожлантириш ва бу соҳа учун малакали тренерларни тайёрлаш муаммоларига бағишланган давлат илмий техник дастурлари доирасида илмий-амалий лойиҳалар танловини ташкил қилади.