Грузиянинг Тбилиси шаҳрида дзюдо бўйича Гран-при сериясига кирувчи мусобақа давом этмоқда. Айни пайтга келиб, оғир вазнли спортчилар ўртасида саралаш баҳслари якунланди.

Унга кўра, кечки дастурда 2 нафар юртдошимиз медаллар учун курашадиган бўлди. -90 килограмм вазн тоифасидаги вакилимиз Давлат Бобонов Грузия, Польша, Сербия вакилларини мағлуб этиб, ярим финалда кубалик рақибига имкониятни бой берди. Бобонов энди бронза медали учун мўғулистонлик Алтанбагана Гантулгага қарши курашади.

Шунингдек, -100 килограмм вазн тоифасида баҳс олиб бораётган Муҳаммадкарим Хуррамов ҳам бронза медали учун кураш олиб боради. Хуррамов шоҳсупага кўтарилиш учун италиялик Жулиано Лопорчиони мағлуб этиши керак.