Европа профессионал футбол лигалари ассоциацияси (EPFL) аввалроқ чемпионлар лигасида ўзгартиришларни таклиф қилган Европа клублари ассоциациясининг (ЕСА) ғоясига қарши чиқди.
"Европа клублар мусобақаларида ислоҳотлар ўтказиш таклифи бир нечта бой клулар фойдасига ишлайди, бироқ кўпчилик клублар ва лигаларга зарар келтиради деган фикрда қоламиз.
EPFL еврокубокларда ҳам, ички миллий чемпионатларда ҳам спорт ва молиявий барқарорликни таъминлайдиган ўзгаришлар устида ишламоқда.
УЕФА клуб мусобақалари лойиҳаларига ўзгартиришлар киритиш учун ҳаммасини нолдан бошлаши керак деб ҳисоблаймиз. УЕФА барча профессионал клубларнинг қизиқишларини ҳимоя қилиш учун бошқа томонлар билан келишиши керак", - дейилади EPFL баёнотида.
Аввалроқ "Ювентус" президенти Андреа Аньелли бошлиқ Европа клублари ассоциацияси (ЕСА) еврокубоклар учун ички чемпионатларда сараланиш ўрнига Европа футбол пирамидаси тизими - юқори ва қуйи поғоналардан иборат чемпионлар лигаси ташкил қилишни таклиф қилган эди.
Шунингдек, чемпионлар лигаси ўйинлари дам олиш кунларига, ички чемпионат ўйинлари ҳафта ўртасига кўчириш ғояси ҳам илгари сурилган.
