Хабарингиз бор, жорий йилнинг 19 март ва 3 апрель кунлари Президентимиз раислигида ўтказилган йиғилишларда ёшлар таълим-тарбияси учун қўшимча шароитлар яратиш, хотин-қизлар бандлигини оширишга қаратилган комплекс чора-тадбирларни ўз ичига олган 5 та ташаббусни амалиётга жорий этиш вазифалари белгилаб берилган эди.

Республикамизнинг барча ҳудудларида ташкил этилаётган турли мусобақалар, оммавий тадбирлар ва машҳур спортчилар билан учрашувлар мазкур топшириқлар ижросини таъминлашга қаратилган.

Жорий йилнинг 22-23 май кунлари Ургут тумани Чеп маҳалласида “Ёшлар-келажак бунёдкори” шиори остида уюштирилган шундай тадбирлардан бири доирасида волейбол, футбол, кураш, стол тенниси, шахмат ва шашка бўйича мусобақалар ҳамда оммавий югуриш марафони ўтказилди.

Ушбу спорт тадбирида 600 нафардан ортиқ 7 ёшдан 30 ёшгача бўлган маҳаллий ёшлар иштирок этишди. Якунда ғолиб ва совриндорларга диплом ва эсдалик совғалари топширилди.

Шунингдек, нуфузли спорт мусобақаларида ғолибликни қўлга киритган вилоятдаги таниқли спортчилар билан учрашув ҳам ташкил этилди.