23-24 май кунлари велоспортни янада оммалаштириш, турли ёш тоифалари, айниқса, ёшларни спортга кенг жалб қилиш, улар ўртасида соғлом турмуш тарзини тарғиб қилиш мақсадида водий бўйлаб “Олтин водий велотур” соғломлаштириш спорт тадбири ташкил этилди.
Кеча, 23 май куни Андижон шаҳри марказидаги Бобур майдонида ўтказилган велотур бошланишига бағишланган тантанали тадбирда 1000 дан ортиқ ёшлар иштирок этдилар.
Андижон вилояти ҳокими соврини учун ўтказилаётган ушбу велотур Андижон, Наманган, Фарғона вилоятлари жисмоний тарбия ва спорт бошқармалари ҳамкорлигида ташкил этилиб, Андижон вилоятининг 11 та, Наманган вилоятининг 5 та, Фарғона вилоятининг 5 та туман ва шаҳарларини ўз ичига қамраб олган 260 км масофага ўтказилмоқда.
Унда вилоят ҳокимининг ўринбосари Ўткирбек Шукуров сўз олиб, мамлакатимизда спортга, қаратилаётган эътибор хусусида алоҳида фикр билдирар экан ушбу тадбир давлатимиз раҳбари томонидан илгари сурилган бешта муҳим ташаббус асосида ташкил этилганлигини таъкидлади. Шу ўринда спортчиларга Андижон, Наманган ва Фарғона бўйлаб давом этадиган 260 километрлик масофани соғ-саломат босиб ўтишларида омад ва зафарлар тилади. Шундан сўнг велоспортчилар ҳаракатига старт берилди.
Спортчилар Андижон шаҳридан Олтинкўл туманига кириб борар экан уларни туман фаоллари, ёшлар ва кенг жамоатчилик вакиллари карнай сурнай садолари остида кутиб олинди. Йўл давомида спортчиларга тумандаги ҳаваскор велосипедчилар ҳам ҳамроҳ бўлиб бордилар. Айниқса, Балиқчи туманида ташкил этилган кутиб олиш маросими спортчиларни янада шижоат билан олға босишга ундади. Ўз навбатида тумандаги ёшлар ва аёл велоспортчиларнинг сафга қўшилгани барча иштирокчиларга кўтаринкилик улашди. 75 километрдан ортиқроқ масофани босиб ўтган спортчиларни туманнинг Наманган вилояти билан туташган ҳудудида балиқчилик кекса нуронийлар, кенг жамоатчилик вакиллари ва ёшлар гулдасталар билан қарши олдилар. Туман ижодкорлари томонидан тайёрланган бадиий чиқишлар барчага бирдек ҳуш кайфият улашди.
Кунинг иккинчи ярмида марафон иштирокчилари Фарғона вилоятининг Қўштепа туманига етиб келдилар. Уларни ҳудуддаги спортчи нуроний отахонлар қарши олдилар. Вилоят маркази сари бўлиб ўтган вело юриш нафақат иштирокчиларни балки, атрофдагиларни ҳам бефарқ қолдирмади. Тадбир қатнашчилари кечга яқин шаҳар марказидаги Фарғона ихтисослаштирилган олимпия захиралари мактаб-интернатига етиб келдилар. Уларни муассасанинг фаол спортчи ёшлари кутиб олдилар.
Бугун тадбирнинг иккинчи кунида Фарғона шаҳрининг диққатга сазовор жойларини айланган велотур иштирокчилари Қува орқали Асака тумани йўл олишади.
