Фейсбукнинг Maslahat.uz гуруҳида Дилшод Ҳаитметов қизиқ воқеа ҳақида ҳикоя қилган.

Бугун Истанбулдаги "Жавоҳир" савдо супермаркетида қизиқ бир воқеанинг гувоҳи бўлдим. Яқинларимга эсдалик совғаларини ола туриб, "Бешиктош" "фирменный" магазинига кирдим ва калитга тақиладиган "брелок"лардан сотиб олдим. Сотувчи қиз брелокларни "Бешиктош" расми туширилган целофан пакетга жойлаштирди. Сўнгра "Галатасарой" "фирменный" магазинига кирдим. У ерда ҳам "Галатасарой" жамоасининг брелокларидан ҳарид қилдим. Сотувчи бола брелокларни "Галатасарой" расми туширилган целофан пакетга солмоқчи эди, мен унга:

— Керак эмас пакет, — дедим ва брелокларни олиб, Бешиктош пакетига жойлаштирмоқчи бўлгандим... Бояги сотувчи боланинг жаҳли чиқиб, менга ўқрайиб:

— Ол бу ёққа брелокларни, "Бешиктош" пакетига аралаштирма уларни. Агар меҳмон бўлмаганингда адабингни берардим, — деса бўладими?

Унинг бу дўқ уришидан тушундимки, сотувчи бола "Галатасарой"нинг ашаддий мухлиси, яъни "фанат"и экан. Мен эса билмай унинг ҳамиятига тегибман.

Хуллас ҳаммаси яхши якунланди. Баҳонада танишиб ҳам олдик. Сотувчи бола "Галатасарой" пакетига брелокларни сола туриб, "Эшитишимча, Туркия суперкубоги Тошкентда ўтказилармиш, шу ростми?", деб сўради. Мен ҳозирги пайтда шу масала устида Ўзбекистон ва Туркия футбол ассоциациялари ишлашаётганини айтдим.

— Агар шундай бўлса, ман албатта Тошкентга бораман, деди сотувчи.
— Албатта келинг, биргалашиб кўрамиз, - дея магазинни тарк этдим...

Маълумот ўрнида. 2019 йилги Туркия суперкубоги баҳси "Галатасарой" ва "Акхисар Беледиеспор" жамоалари ўртасида кечади. "Галатасарой" 2018/2019 йилги мавсумда ҳам чемпионликни, ҳам мамлакат кубогини қўлга киритди. "Акхисар Беледиеспор" эса Туркия кубоги финалигача етиб келди.