Дзюдочиларимиз Токио татамиларида ўтаётган жаҳон чемпионатида ажойиб натижалар қайд этаётганидан хабарингиз бор. Мазкур мусобақани МОҚ вице-президенти, Ўзбекистон дзюдо федерацияси раҳбари Азизжон Камилов ҳам бевосита Токиодан кузатиб бормоқда. А.Камилов мусобақага ташрифи доирасида Япония МОҚ раҳбари Ясухиро Ямасита билан учрашди.
Учрашув ҳар икки томоннинг илиқ суҳбати остида кечди. Ўз навбатида Азизжон Камилов ЖЧдан аввал дзюдочиларимиз ўтказган йиғиннинг юқори савияда кечишида яқиндан ёрдам бергани учун Япония томонига чуқур миннатдорчилик билдириб ўтди.
“Аввало, Майдзуру йиғинини ташкил қилишда яқиндан ёрдам бергангиз учун Сиз ва Япония дзюдо федерациясига ўз миннатдорчилигимни билдириб қоламан. Йиғиннинг қанчалик фойда келтиргани мана бугун исботланмоқда. Ўйлайманки, бундай ҳамкорликни янада мустаҳкам ва бардавом қилиш ҳар икки томон учун ҳам манфаатли. Дзюдо ва бошқа спорт турлари бўйича терма жамоаларимизни Токио Олимпиадасига тайёрлаш борасида мана шундай қўшма ҳамкорлик қилишни Ўзбекистон томони қўллаб-қувватлайди”, – деди Азизжон Камилов.
Ўз навбатида Ясухиро Ямасита ўзбек дзюдо мактабининг равнақи ва қудрати ҳақида илиқ фикрлар билдириб, бундай ҳамкорликни давом эттиришдан мамнун эканлигини билдириб ўтди. Учрашув якунида Азизжон Камилов мана шундай тиғиз вазиятда суҳбат учун вақт ажратган Ясухиро Ямаситага ташаккур айтиб, эсдалик совғаларини тақдим қилди.
