"Реал" бош мураббийи Зинедин Зидан Испания чемпионатининг 6-тури доирасида "Осасуна" қарши ўтказиладиган учрашув олдидан истеъфога чиқиши мумкинлиги хусусидаги фикрлари билан ўртоқлашди.
"Агар "Реал" мағлубиятга учраса, мени истеъфога чиқаришади. Агарда ғалаба қозонсак, қоламан. Доим шундай бўлган ва шундай бўлиб қолади. "Осасуна"га қарши ўйин эртага бўлиб ўтади. Биз ушбу учрашувга катта иштиёқ ва кўтаринки кайфият билан тайёрланишимиз лозим. Мен шу ҳақда ўйлаяпман. Ғалабага эришиш учун бутун 90 дақиқа давомида яхши футбол намойиш этишимиз зарур. Ла Лигада ҳар доим рақобат бўлган, шунинг учун ҳар бир учрашув юксак савияда ўтган. Шу боис ҳар бир учрашувда бор куч билан ҳаракат қилиш керак", - дея Зиданнинг сўзларини келтириб ўтади AS.
