Саудия Арабистони мезбонлик қилаётган ёшлар ўртасидаги Осиё чемпионати саралаш босқичининг "F" гуруҳи ўйинлари якунланди. Сўнгги турда ўзбекистонлик ёшлар мезбонларга қарши майдонга чиқишди.

Биринчи бўлим давомида устунлик Отабек Ғуломхўжаев шогирдлари томонида бўлди. Улар камида 3та голга тортадиган вазиятдан фойдалана олишмади. Таймга қўшиб берилган дақиқаларда эса саудияликлар бурчак зарбасини амалга оширишди. Ҳакам эса қоидабузарлик туфайли дарвозамизга пенальти белгилаб, ҳимоячимизни майдондан четлатди.

Ўйин тугашига 2 дақиқа қолганидан эса Жалолиддин ўнг қанотдан бир ҳимоячидан қочиб кетиб, дарвозабон билан яккама-якка вазиятда зарба берди. Дастлабки зарбани дарвозабон қайтарган бўлса, такрорий зарба билан "Бунёдкор" футболчиси дарвозани ишғол қилди.

Ушбу дуранг туфайли Ўзбекистон U-19 терма жамоаси 7 очко тўплаган ҳолда "F" гуруҳида тўплар нисбатига кўра иккинчи ўринни эгаллади. Бу натижа орқали Ўзбекистон термаси гуруҳларда иккинчи ўринни эгаллаганлар жадвалида 4-ўринни банд этди.

Маълумот ўрнида. Ўзбекистон ёшлар ўртасидаги Осиё чемпионати мезбони сифатида қитъа биринчилиги йўлланмасини эртароқ қўлга киритиб бўлган эди. Жамоамиз ўз гуруҳида йўлланма тақдим этувчи ўринни эгаллагани боис, саралаш гуруҳларида 2-ўринни эгаллаган бешинчи жамоага ҳам йўлланма тақдим этилади.

U-19 Осиё Чемпионати-2020 саралаши, "F" гуруҳи, 3-тур
Саудия Арабистони – Ўзбекистон 1:1
Голлар: Басил Юссуф ас-Сайяли (45+3-пенальти) - Жасурбек Жалолиддинов (88).
Ўзбекистон U-19: Абдувоҳид Неъматов, Саидазамат Мирсаидов, Хуршидбек Убайдуллаев, Иброҳимҳалил Юлдошев, Одилбек Абдумажидов, Жасурбек Жалолиддинов, Диёр Рамазонов (Суннатиллоҳ Ҳамиджонов), Диёрбек Раҳимқулов, Руслан Розиев (Музаффар Олимжонов), Хожимат Эркинов, Улуғбек Ҳошимов.