Болгария терма жамоаси сардори Ивелин Попов терма жамоадаги ҳалқаро фаолиятини якунлаганини эълон қилди.
Попов Чехия терма жамоасига қарши Евро-2020 саралаш доирасида бўлиб ўтган ўйиндан кейин бу ҳақда маълум қилди.
«Бу менинг 90-ўйиним бўлди. Терма жамоада 12 йил тўп сурдим. Европа чемпионати финал босқичига чиқа олмаганимиздан сўнг, ёшларга ўрин бўшатиш керак эканлигини англадим. Ёшим 32да ва бор эътиборимни «Ростов» клубига қаратишим керак. Саккизта мураббий қўл остида терма жамоа сардори бўлдим. Қийин йўлларни босиб ўтдим ва якунлаш кераклигини ўзимга ўзим айтдим. Энди мен Болгария терма жамоасининг энг содиқ мухлиси бўламан», – деди Попов “Ростов” клуби матуот хизматига.
