Лондоннинг “Тоттенхэм” клубида ўзгаришлар давом этмоқда.
Клубнинг янги бош мураббийи Жозе Моуриньонинг сўзларига қараганда, унинг мураббийлар штабида «Лилль» клубининг икки нафар мутахассиси иш бошлади.
Sky Sports нашрининг тарқатган маълумотига қараганда, Франциянинг вице-чемпиони спорт директори Луиш Кампуш ҳам иш бошлаш арафасида турибди. Кампуш Моуриньо билан дўстона муносабатда.
55 ёшли португалиялик Кампуш 1993 йилдан 2005 йилгача ўз ватанида «Авеш», «Жил Висенте», «Виторию» (Сетубал)ва «Бейра-Мар» клубларида мураббий бўлиб ишлаган. Кейинчалик у “Реал”да скаут бўлиб ишлади. Сўнгра «Монако» клубида раҳбарлик лавозимида фаолият олиб борганидан сўнг, 2017 йилнинг ёзида «Лилль» клубида спорт директори лавозимида иш бошлади.
Ўз вақтида Кампуш ўзи ишлаган клубларига Хамес Родригес, Килиан Мбаппе, Антони Марсьяль, Фабиньо, Николя Пепе ва бир қатор машҳур футболчиларнинг трансферларида иштирок этган ва ўзи ишлаган клублар учун 600 миллион еврога яқин фойда олиб келган.
