Коронавирус Чемпионлар Лигасига ҳам етиб келди. Бугунги Париж баҳси ростанам ғалати кечса керак. Чунки немислар ҳам, французлар ҳам клубларига қаттиқ далда бўлиб беришади. Ҳар хил услубдаги ёндошувлари билан. Ана шу далда йўқ ва жамоалар бўм-бўш стадионда ўзларини қандай тутишади, очиғи менга роса қизиқ.

Сизга ҳам қизиқ бўлса, аввал 23:55да старт оладиган Футбол студиясини кузатинг, сўнг "ПСЖ" - "Боруссия" иштирокидаги жавоб ўйинини томоша қилинг.

Тухелни Дортмунд қандай кутиб олгани ёдимизда. Энди Томас собиқ жамоасини Парижда қандай кутиб олади, бу ҳам қизиқ.

Яна шу қизиқки, олдинги ўйинда катталарга "безбетларча" жавоб қайтарган Холландни Неймар ва Мбаппе қандай кутиб олади. Ахир, кечагина "тухумдан чиққан жўжа" хўрозларга қичқира бошлади. Бу номдор юлдузларга аламли ҳолат эмасми?!

Учрашув FUTBOL TV каналида 01:00да старт олади.
Параллел ўйин "Энфилд"даги баҳс.
Қийин танлов, а?
Асосийси иккисида ҳам биз кутмаган ҳодисалар содир бўлиши мумкин.

Парижда кўришгунча!)

Хайрулла ҲАМИДОВ.