Бундеслигада мавсумни давом эттириш учун қандай хавфсизлик чоралари режалаштирилаётгани маълум бўлди.

Der Spiegel хабарига кўра, Германия Меҳнат вазирлиги 2та асосий вариантни кўриб чиқмоқда.

Биринчиси – барча футболчилар, мураббийлар, тиббий ходимлар мавсум охирига қадар карантинга олинади. Мисол учун, улар катта меҳмонхонага жойлаштирилиши мумкин.

Иккинчиси – футболчилар ва ҳакамлар спорт ўйинлари учун мўлжалланган ниқоб тақишади. У тиббий стандартларга мос келиши ва бир марталик бўлмаслиги, ўйин пайтидаги курашларда тушиб қолмаслиги лозим. Ниқобга ўйин давомида қўл теккизиш тақиқланади. Агар у тушиб қолса, ўйин тўхтатилиши талаб қилинади. Қолаверса, голларни биргаликда нишонлаш ҳам тақиқланади. Бу қоидани бузганлар сариқ карта билан огоҳлантирилади.

Эслатиб ўтамиз, Бундеслига май ойидан бошлаб мухлисларсиз давом эттирилиши ҳақида хабарлар тарқалганди.