14 май — Санкт Петербургнинг “Зенит” клуби УЕФА кубогини қўлга киритган сана. 2008 йил. Ўзи ўша мавсумни рус футболининг чўққиси десак тўғри бўларди. Терма жамоа Европа миқёсида кучли тўртликдан ўрин олган ва ярим финалгача Нидерландияни мағлуб этгани ҳанузамки рус ишқибозининг ёдидан кўтарилмайди.

Бош мураббий Дик Адвокат бўлгани ҳолида "Зенит" УЕФА кубогида феноменал ўйинлар кўрсатди. Владислав Радимовнинг тўлишган даври, Андрей Аршавин отнинг устида, Роман Широков кашф этилган, жамоа сардори Анатолий Тимошчукнинг юлдузли онлари, Павел Погребнякни бир қатор клублар суриштираётган дамлар ва чемпионат тўпурарларидан бири Фотиҳ Теккенинг голлари ўша йилги мусобақани мутлақ "Зенит"га олиб берди.

"Зенит" "Сити оф Манчестер"да 14 май оқшомида "Глазго Рейнжерс"ни мағлуб этишидан олдиноқ турнир фаворити эканини кўрсатиб қўйганди.

Йўлида "Бавария"ни – 4:0 ҳисобидаги катта ҳисоб билан, "Байер" Ливеркузенни – унга ҳам тўртта гол, "Марсел"у "Вильярреал"ни доғда қолдириб чиққанидан ҳам билсак бўладики, бу йўл анча машаққатли йўл эди. Таққослаш учун айтаман: "Глазго" бу томондан "Вердер"ни, "Панатинаикос"ни, "Спортинг"ни ва "Фиорентина"ни доғда қолдирган. "Зенит"нинг чемпион бўлиши адолатдан эди аслида.

Ўйиннинг ўзига келадиган бўлсак, икки жамоа ҳам анча тартибли ҳаракатланган. Жисмоний томондан устунлиги сезилган питерликлар 72 дақиқалик сукунатни Денисовнинг голидан сўнг бузишга муваффақ бўлишган. Сўнгги дақиқаларда ҳаддан ташқари ҳужумга ўтиб кетган шотландлар қарши ҳужумдан жазоланишгани ёдимизда. Гол муаллифи – Зирянов эди. 2:0 ва "Зенит" суперкубокка, энди "Манчестер Юнайтед"ни махф этиш учун йўл олади. “Луи II" стадионидаги навбатдаги зафардан сўнг Россия терма жамоаси Евро-2008 да зўр ўйнамаслиги мумкин эмасди. Ҳаммаси давомий ва натижалар параллели тўғри.

Хайрулла Ҳамидов.