ПСЖ спорт директори Леонардо 5 нафар футболчининг жамоадан кетишини маълум қилди.
Унинг айтишича, июнь ойида шартномаси тугайдиган Тиаго Силва, Эдинсон Кавани, Лайвин Курзава, Томас Менье ва Эрик Максим Шупо-Мотинглар клуб билан хайрлашади.
Аммо Париж клуби бу футболчиларни Чемпионлар Лигасида ўйнатиш учун август охиригача олиб қолмоқчи. Бироқ буни ҳуқуқий жиҳатдан имкони борми ёки йўқ, клуб ҳозирча билмайди.
Силва 2012 йилдан бери "ПСЖ"да ўйнайди ва айни дамда сардор. Кавани жамоа тарихидаги энг яхши тўпурар ҳисобланади, у 300 та ўйинда 200 та гол урган.
Курзава ПСЖга 2015, Менье 2016, Шупо-Мотинг эса 2018 йилда келиб қўшилган.
