Узоқ танаффусдан сўнг ишқибозлар интиқиб кутган футбол мавсуми "рестарт" олди. Дам олиш кунлари ва душанба куни ўтган Ўзбекистон Суперлигаси 4-тур баҳслари анча шиддатли, кутилмаган ва қизиқарли воқеаларга бой ўтди.
14 июнда “Миллий“ стадионда меҳмон бўлган "Қўқон-1912" бутунлай иккинчи рақамли жамоа бўлиб намойиш этган, ўта эҳтиёткор футболи эвазига "Бунёдкор"га имкониятини бой берди 1:0.
Навоийда кечган, "Қизилқум" ва "АГМК" жамоалари ўртасидаги учрашувда, Эркин Байдуллаев, Мате Ватсадзелар қаторида собиқ жамоасига қарши майдонга тушган Элгужа Григалашвилининг ягона голи Олмалиқликларга кичик ғалабани келтирди 0:1.
Дам олиш кунида эса кутилмаганда, чемпионат етакчиси, Шота Алверадзи қўл остидаги жамоа, Жиззахда мағлубиятга учради. Белгиланган пенальтидан фойдалана олмаган Шоҳруз Норхонов, ўйиндан гол киритиб, ўз жамоасига 21 йил деганда ўзаро ўйинлардаги ғалабани келтирди. "Сўғдиёна" ва "Пахтакор" 1:0.
Ўша куни, Қаршидаги баҳс ҳам кутилганидек турнинг марказий учрашуви мақомида ўтди. Бир эмас, икки марта 11 метрдан дарвозага кирмаган тўп. Аммо, 4 та гол. "Насаф" ва "Навбаҳор" 2:2. Якунда, жанговор дуранг.
Душанбада мухлислар тур доирасидаги 3 та ўйинга гувоҳ бўлишди. Даставвал, Термизда, Баҳром Ҳайдаров жамоаси "Машъал"га қарши дуранг қайд этди 2:2. Шу тариқа "Сурхон"нинг Муборакликларга қарши Термиздаги мағлубиятсиз ўйинлари кўрсатгичи сақланиб қолди.
"Бухоро" ва "Андижон" жамоалари ўртасидаги ўйин, маълум сабабларга кўра Муборакдаги ўйингоҳда бўлиб ўтди. Норхонов, Эшмуродов, Турғунбоелардан фарқли равишда Жамшид Ҳасанов белгиланган иккала пеналтьни ҳам голга айлантирди. Мезбон сифатида ҳаракат қилган Бухороликлар эса иродали ўйин намойиш этиб, сўнгги дақиқаларда мағлубиятдан қутулиб қолишди. Умумий ҳисоб 2:2.
Пойтахтда меҳмон бўлган Андрей Шипилов шогирдлари "темирйўлчилар" дарвозасига жавобсиз 3 та тўп йўллаб, рақибга ҳеч қандай имконият қолдиришмади. Игнати Нестеров дарвозасига Шаҳзод Убайдуллаев томонидан киритилган гол эса нафақат ўйин балки, тур безагига айланди. Якунда, "Локомотив" ва "Металлург" 0:3.
Дадажон Фозилжонов
