«Боруссия Д» сафида ижара асосида тўп сураётган «Реал» ҳимоячиси Ашраф Ҳакимий фаолиятини «Интер»да давом эттиради.

Италиялик журналист Жанлука ди Марционинг хабар қилишича, томонлар келишувга яқин турибди. Миланликлар трансфер учун 40 миллион евро сарфлайди. Шунингдек, 5 миллион евро бонус ҳам назарда тутилган. Музокаралар ҳали поёнига етмаган, таъкидланишича, 27 июнь ҳал қилувчи кун бўлади.

Манбада айтилишича, марокашлик футболчига «Манчестер Сити» ва «Бавария»дан ҳам қизиқиш бўлган. Икки клуб ҳам футболчи учун 60 миллион евродан воз кечишга ва Ҳакимийнинг ўзига йилига 5 миллиондан ортиқ маош тўлашга рози бўлган. Бироқ Ашрафнинг ўзи «Интер» вариантини танлаган.

Bild нашри журналисти «Бавария» Ҳакимийга кўпроқ маош таклиф қилгани ҳақидаги хабарни инкор қилган.

Ҳакимий Бундеслига жорий мавсумида 32 ўйин ўтказиб, бешта гол ва 10 та голли узатма муаллифига айланган.