Англия чемпионатининг 35-тури доирасида Шимолий Лондоннинг «Тоттенхэм» ва «Арсенал» жамоалари ўртасидаги дерби бўлиб ўтди.

Учрашувнинг дастлабки 20 дақиқаси хавфли вазиятларга бой бўлди. Дастлаб ҳар икки жамоа биттадан қулай вазиятлардан фойдалана олмади. Орадан кўп ўтмасдан Александр Ляказетт ўта кучли зарба билан тўпни "шпорлар" дарвозасига жойлаб қўйди.

Ушбу голдан атиги 3 дақиқа ўтиб мезбонлар ҳисобни тенглаштиришди. Меҳмонлар ҳимоячилари Колашинац ва Давид Луизнинг хатосидан фойдаланган Сон Хёнг Мин чиройли зарба билан дарвозани ишғол қилди.

Баҳснинг 31 ва 32-дақиқаларида томонлар яна биттадан хавфли вазиятни юзага келтиришди. "Тоттенхэм" ҳимоячиси Бен Дэвис кутилмаганда 35 метрлардан зарба йўллади, тўп эса тўсинга тегиб қайтди.  Николя Пепенинг жарима майдони остонасидан йўллаган зарбасига бироз аниқлик етишмади. 40-дақиқада Обамеянгнинг зарбаси ҳам бирозгина ноаниқ чиқди.

Иккинчи бўлимда тўп назорати "канонирлар" томонида бўлди. Учрашувнинг 60-дақиқасида Обамеянг томонидан 10 метрлардан йўлланган зарба натижасида тўп тўсинга тегиб қайтди...

Баҳс тугашига 8 дақиқа қолганида "Тоттенхэм" томонидан амалга оширилган бурчак зарбаси омадли чиқди: Тоби Алдервейрелд 7 метрлардан бош билан дарвозани забт этди.

Натижада, тенгкурашлар остида кечган ўйинда Жозе Моуриньо жамоаси ғалабани қўлга киритди. "Тоттенхэм" ўз очколарини 52тага етказди ва "Арсенал"ни қувиб ўтганча жадвалда 8-ўринга кўтарилиб олди.

АПЛ, 35-тур
Тоттенхэм – Арсенал 2:1 (1:1, 1:0)
Голлар: 0:1 – 16 Ляказетт, 1:1 – 19 Сон Хёнг Мин, 2:1 – 81 Алдервейрелд.
Тоттенхэм – Льорис, Орье, Алдервейрелд, Дэвис, Санчес, Уинкс, Ло Чельсо (Скипп, 84), Лукас Моура (Бергвейн, 82), Сиссоко, Сон Хёнг Мин (Ламела, 90), Кейн.
Арсенал – Мартинес, Бельерин (Соареш, 84), Давид Луиз, Мустафи, Тирни (Уиллок, 84), Себальос, Жака, Пепе (Сака, 70), Колашинац (Нелсон, 84), Ляказетт, Обамеянг.
Огоҳлантиришлар: Ло Чельсо (16), Орье (34), Ляказетт (45), Дэвис (45), Пепе (61), Уинкс (76), Бергвейн (87), Сака (90).