“Манчестер Юнайтед” янги мавсумга лигадаги энг узун мағлубиятсиз серия билан кириб келмоқда – 14 ўйин. Ҳақиқатдан “локдаун”дан бироз аввал ва кейин МЮ қандай ўйин кўрсатганини барчамиз эслаймиз. Кўпинча Бруну Фернандеш билан боғланаётган муваффақият аслида бутун жамоаники, албатта.

Трансфер бозори очиқ экан (5 октябргача) Сульшерни бу борада омадсизга чиқармаган бўлардим. Тўғри, Санчо атрофидаги воқеалар жуда чўзилиб кетди. Кейин, ўйини кескин кучайнан Гринвудни заҳирага михлаш билан якунланиши эҳтимоли юқори бўлган бу трансфер шунчалик керакми ўзи? Кўп эҳтимол керак. Мейсон жуда ёш ва Дейдонни келиши унинг учун катта чақириқ бўлади. Лекин, Донни ван Де Бик, Поль Погба ва Бруну Фернандешни бир вақтда майдонга тушуришга уриниб кўрмоқчи бўлган Оле бу иккиси билан ҳам бир йўл топса керак.

Очиғи, клуб менга борган сари Сульшер ўзи майдонда ҳаракат қилган даврларни эслатиб юборяпти. Албатта, етакчилар бор. Аммо, барчаси мутлақ уларга боғланиб қолмаган. Фернандешчи, дейисизми? Билмам. Тахминимга кўра, бу мавсум энди у ҳам кўпроқ жамоага сингиб олади. Алоҳида эмас, бир бутун меҳанизмнинг қисмига айланади. Кўрамиз.

Биринчи турни ўтказиб юборган МЮ мавсумни “Кристал Пэлас”га қарши бошлайди. Қулай рақиб. Қария Рой Ходжсон шогиртлари ўтган мавсумни 14 поғонада якунлаган-у, аммо, бугунги рақибга қарши бир ўйинда ғалаба қозонгани ҳам бор, дарвоқе – 1:2. Ҳа, ўшанда ҳам “Олд Траффор”даги ўйин эди, бугунгиси каби...