Испания чемпионатининг 3-тури доирасида «Барселона» ўз уйида «Вильярреал»ни қабул қилиб, йирик ҳисобда ғалаба қозонди.

Каталонияликлар биринчи бўлимнинг ўзида рақиб дарвозасини 4 марта ишғол қилишди. Учрашувнинг 15 ва 20-дақиқаларида Ансу Фати янгиланган "Барселона"нинг илк голларига муаллифлик қилди. Унга Альба ва Коутиньо ассистентлик қилишди.

Орадан кўп ўтмасдан 17 ёшли футболчи пенальти ишлади ва ундан Месси самарали фойдаланди. Тайм сўнгида эса Лионель етказиб берган тўпни ҳимоячи Пау Торрес ўз дарвозасига буриб юбориб, автогол муаллифига айланди.

"Кўк-анорранглилар" иккинчи бўлимни нисбатан хотиржам ўтказишди. Жамоа яна бир нечта имкониятларга эга бўлганига қарамай, учрашувда ҳисоб бошқа ўзгармади.

Шу тариқа, "Барселона" янги бош мураббий Роналд Куман бош мураббийлигидаги илк расмий баҳсни йирик ҳисобдаги ғалаба билан бошлади.

Испания чемпионати, 3-тур
Барселона – Вильярреал 4:0 (4:0, 0:0)
Голлар: 1:0 – 15 Фати, 2:0 – 19 Фати, 3:0 – 35, пенальти Месси, 4:0 – 45, автогол Пау Торрес.
Барселона – Нето, Альба, Лангле, Сержи Роберто, Пике, Коутиньо (Педри, 70), Бускетс (Пьянич, 78), де Йонг, Фати (Дембеле, 70), Гризманн (Тринкау, 78), Месси.
Вильярреал – Асенхо, Эступиньян, Альбиоль (Фунес Мори, 84), Марио Гаспар, Пау Торрес, Парехо, Чуквуэзе (Кубо, 74), Коклен (Тригерос, 46), Мойсес Гомес, Жерар Морено (Бакка, 84), Пако Алькасер (Иборра, 46).
Огоҳлантириш: Жерар Морено (83).