Ўзбекистон Суперлигаси 17-тур ўйинлари якунига етди. Ҳар доимгидек тур лауретларини эълон қилишда давом этамиз.
Stadion.uz талқинига кўра, 17-турининг энг яхши мураббийи деб "Андижон" бош мураббийи Бахтиёр Ҳамидуллаев топилди.
Ҳамидуллаев шогирдлари мазкур турда мавсумдаги илк ғалабасига эришди. "Бургутлар" ўз майдонида "Бухоро"ни қабул қилиб, 2:1 ҳисобида ғалаба қозонди. Ушбу ғалаба эвазига "Андижон" турнир жадвалида 13-ўринга кўтарилиб олди.
Турнинг энг яхши футболчиси деб "Локомотив" ҳужумчиси Темурхўжа Абдуҳолиқов топилди.
"Темирйўлчилар" форварди "Металлур”га қарши кечган баҳсда жамоасининг икки голида ҳам қатнашди. Дастлаб у Махарадзенинг голига ассистентлик қилди, кейинчалик ўз номига гол ҳам ёздириб қўйишга эришди.
17-турнинг энг яхши дарвозабони сифатида "Насаф" посбони Абдувоҳид Неъматов қайд этилди.
Неъматов Наманганда кечган турнинг марказий ўйинида бир нечта вазиятларда "аждарлар"ни муқаррар голлардан қутқариб қолди. Қолаверса, у ўзининг дарвозаси даҳилсизлигини ҳам сақлаб қолди. Шунингдек, Неъматов мазкур турнинг рамзий терма жамоасидан ҳам ўрин олди.
